नेपाली जनसम्पर्क समिति जापानको सभापतिमा शेर्पाको उम्मेद्वारी

उनले एक अपिल प्रकाशित गर्दै आफ्नो उम्मेदवारी घोषणा गरेका हुन् । उनले आफ्नो उम्मेदवारी घोषणा गर्दै उर्जाशील, क्रियाशील र संर्घषशील सदस्यहरुको आत्मबल र विश्वासलाई समेटेर कुशल नेतृत्वको नमुनाको रुपमा समितिलाई स्थापित गराउने प्रतिबद्धता जाहेर गरेका छन् ।

उनले, ‘सहभागीतामूलक राजनीतिक पद्धति र बैचारिक राजनीतिक नेतृत्व विकासका निमित्त पनि मेरो उम्मेदवारी कोसेढुंगा साबित हुनेछ ।’ भनेका छन् ।

उम्मेदवारी घोषणा गर्दै गरिएको अपीलको पूर्ण पाठ यस्तो छ :–
आदरणीय लोकतन्त्रप्रेमी जापानबासी नेपाली दाजु भाई तथा दिदी बहिनीहरु एवं सम्पूर्ण मित्र वन्धुहरुमा जय नेपालको न्यानो अभिवादन ! नेपाली जनसम्पर्क समिति जापानको स्थगित पाँचौ अधिवेशन सम्पन्नताको पूर्वसन्ध्यामा रहनुभएका नेपाली काँग्रेसको आदर्श, बिचार, सिन्द्धान्तप्रति प्रतिबद्ध साथीहरु हार्दिक जय नेपालको न्यानो अभिवादन गर्न चाहान्छु ।

परिवर्तनसँगै समाजको पनि समुचित परिवर्तनका निमित्त सुरुवात आफैंबाट गर्नुपर्ने सर्वमान्य सिद्धान्त अनुरुप त्यसलाई एउटा गहन जिम्मेवारीको रुपमा लिँदै फेरी एकपटक यही समाजको जिम्मेवार सदस्यका रुपमा आफुलाई प्रस्तुत गर्दछु । सन्दर्भ यही आउँदो मे २५ मा सम्पन्न हुन लागेको नेपाली जनसम्पर्क समिति जापानको अधिवेशनको रहेको छ । उर्जाशील, क्रियाशील र संर्घषशील साथीहरुको आत्मबल र विश्वासलाई समेटी कुशल नेतृत्वको नमुनाको रुपमा नेपाली जनसम्पर्क समिति जापानलाई तपाईहरुको माझ फेरि एकपटक स्थापित गर्नका लागि म पासाङ शेर्पाले सभापति पदमा आफ्नो उम्मेदवारी घोषणा गर्दछु । ने.ज.स.स. जापान जापानभित्र रहेको नेपाली समाजमा बिगतदेखि वर्तमानमा समेत अत्यन्त क्रियाशील सामाजिक राजनीतिक संस्थाको रुपमा स्थापित रहेको यहाँहरुलाई बिदितै छ । राजनीतिक क्रियाकलाप सँगै सामाजिक क्रियाकलापमा पनि सक्रियता बढाउने मेरो प्रयत्न रहनेछ । म आफै यस संस्थाको कार्यबाहक सभापति रहँदै गर्दा ओशाका क्षेत्रको कान्साई क्षेत्रीय समितिको विस्तार त्यसक्षेत्रका साथीहरुको उत्साहपूर्वक सहभागीतामा अति व्यवस्थित ढंगले भएको थियो । दोस्रो जनसम्पर्क समितिको इतिहासमा नियमित केन्द्रीय वैंठक नागोया क्षेत्रमा गरी टोकियो बाहिर पनि बस्ने पद्धति बसालिएको थियो ।

आदरणीय साथीहरु,
बिगतका कार्यकालमा भएका व्यक्तिगत भावना र लहडमा आएर निर्णय गरिने पद्धतिलाई सुद्धिकरण गर्दै यस्ता क्रियाकलापलाई सच्चाएर अगाडि बढ्ने प्रतिबद्धता जनाउँछु । सहभागीतामूलक राजनीतिक पद्धति र बैचारिक राजनीतिक नेतृत्व विकाशका निमित्त पनि मेरो उम्मेदवारी कोसेढुंगा साबित हुनेछ भन्ने मैले बिश्वास लिएको छु । म संस्कार र जन्मका हिसावले शेर्पाको कोखमा जन्मिएको हुँदा जनजातिको वर्गीकरणमा परेको हुँ । त्यो यथार्थपरक पनि हो । बिगतको नेपालको जनजाति आन्दोलन र जातीय राज्यको सवालमा म स्पष्ट छु र त्यसमा नेपाली काग्रेसले अबलम्बन गरेको नीति र कार्यक्रम नै मेरो मुख्य मार्गदर्शन हुने छ । किनकी म बाल्यकालदेखि र बुझ्ने भएदेखि नै नेविसंघ हुँदै नेपाली कांग्रेसको अभियानमा संलग्न भएर जिल्ला र कलेज हुँदै यहाँसम्म आएको हुँ । तर पनि केही साथीहरुले मप्रति केही आशंका र अविश्वास सिर्जना गरेकै हुन् बिगतमा । मेरो निरन्तर सक्रियताले यस्ता प्रबृत्तिलाई पक्कै पनि परास्त गरेको छ भन्ने लागेको छ र पूर्णरुपमा विश्वासका साथ जातीय राजनीतिबाट स्पष्ट छु । स्वर्गीय नेता भिमबहादुर तामाङ दाई नै मेरो प्रेरणाको स्रोत हुनुहुन्छ र रहिरनुहुनेछ भन्ने प्रतिबद्धता पनि जाहेर गर्दछु ।

अन्त्यमा साथीहरु, हामीभित्र संस्था संचालनका क्रममा केही साथीहरुबाट देखिने गरी अराजनीतिक चरित्र र संस्थालाई आर्थिक पहुँचका आधारमा संचालन गर्न सकिन्छ भन्ने खालका गलत मानसिकता तथा त्यस्ता दुष्प्रयासलाई निर्मूल पारेर राजनीतिक बिचार र प्रतिस्पर्धाका आधारमा नेतृत्व पाउनुपर्ने व्यवस्थाको सुनिश्चितताको लागि पनि मेरो उम्मेदवारी हो भन्ने बिश्वास दिलाउदै मलाई सभापति बन्न प्रेरित गर्नु हुने मेरो अग्रज एवं सम्पूर्ण लोकतान्त्रप्रेमी दाजुभाई तथा दिदीबहिनीहरु लगायत आम शुभचिन्तक र साथीहरुमा हार्दिक धन्यवाद ज्ञापन गर्दछु । मैले यो जिम्मेवारीलाई एउटा चुनौती र अवसर दुबैको रुपमा लिएको छु । नेपाली जनसम्पर्क समिति जापानको उत्थानका लागि मेरा सम्पूर्ण अग्रज तथा नेपाली कांग्रेस केन्द्रसँग समन्वय गर्दै आफूले भ्याएसम्म लागि पर्ने छु र यसको लागि यहांहरुको सहयोग सल्लाह र सुझाब अपरिहार्य छ ।

मेरा भावी योजनाहरु–
१. दुई वर्षे कार्यकालमा संगठन विस्तार कार्यक्रम महत्वका साथ अगाडि बढाई साधारण सदस्य र क्रियाशील सदस्यको संख्यालाई अत्याधिक वृद्धि गरी पार्टीको केन्द्रीय महाधिवेशनमा हाम्रो उपस्थितिलाई अझ वृद्धि गर्ने अवसरको सिर्जना गर्ने छु ।

२. जापानमा भएका नेपाली समुदायका बिचमा आइपर्ने सुखदुःखहरुमा हातेमालो गर्दै अगाडि बढ्ने छु ।

३. वर्तमान अवस्थामा नेपालीहरुको जापानप्रतिको बढ्दो आकर्षणलाई मध्यनजर गर्दै त्यसबीचमा आइपर्ने समस्या समाधान र व्यवस्थित बसाईका लागि सहयोग पुग्ने क्रियाकलापलाई अगाडि बढाउने छु ।

४. अव्यवस्थित आर्थिक अवस्थालाई सुधार गर्दै व्यवस्थित आर्थिक कोष निर्माणमा बिशेष पहल गर्ने छु ।

५. आउँदो नेपाली कांग्रेसको महाधिवेशनमा जनसम्पर्क समितिको पनि केन्द्रीय समितिमा उम्मेदवार हुन पाउने व्यवस्थाको लागि पहल गरी जापानबाट केन्द्रीय सदस्यमा प्रतिनिधित्व गराउन पहल गर्ने छु ।