ओलीको अबको मिशन : प्रधानमन्त्रि
Admin / 2014-07-20 01:35:37
काठमाडौं, साउन ४ – दोस्रो संविधानसभामा एमाले दोस्रो दल भएर आएलगत्तै एमालेका नेता केपी ओली समूहले तीन वटा रणनीतिक कदम चाल्ने संकेत दिएको थियो । यस्तो रणनीति हासिल गर्न धेरै समय कुर्नुहुँदैन भन्नेमा पनि ओली र उनका सहयोगीहरू प्रस्ट थिए । ओलीको स्वास्थ्यमा बेला–बेलामा देखिने समस्याले गर्दा पनि जतिसक्दो चाँडो रणनीति पूरा गराउन चाहन्थ्यो ओली समूह । यसका इनसाइड सूत्रधारहरू थिए बालकोट निकट मानिने एमालेका नेताहरू ।
ओलीका तीन मिसन थिए– संसदीय दलको नेता, पार्टी अध्यक्ष र प्रधानमन्त्री । उनी एकैपटक यी तीन उपलब्धि हासिल गर्न चाहँदैनथे, बरु एक–एक गरेर लक्ष्य हासिल गर्ने रणनीतिका साथ अगाडि बढेका थिए । उनी आफ्ना कदममा कहीं न कहीं सफल पनि भएका छन् । दक्षिणी छिमेकीसँग राम्रो सम्बन्ध भएका भनिएका ओलीका लागि अबको लक्ष्य देशको कार्यकारी पदको बागडोर सम्हाल्ने नै हो । पहिलो संविधानसभामा चुनाव हारेपछि धेरै सम्भावना र अवसरबाट वञ्चित भएका ओली दोस्रो संविधानसभामा प्रत्यक्ष चुनाव जितेपछि भने प्रधानमन्त्री बन्न चाहन्थे । नेकपा–एमालेको नवौं महाधिवेशनबाट अध्यक्षमा निर्वाचित भएपछि ओलीले निकै भावुक हुँदै आफूसँग पर्खेर बस्ने समय नभएको र छिट्टै केही गर्ने बताएका थिए । आफ्नो स्वास्थ्य स्थितिको कारणले गर्दा पनि ओली चाँडै राष्ट्रिय राजनीतिमा ‘केही गरेर’ देखाइदिन चाहन्छन् । यसैका आधारमा उनले आफ्नो कार्यसूची तयार पारेका थिए । यसका लागि पार्टीभित्र बलियो शक्ति आफ्नो पक्षमा पार्नु उनी अनिवार्य ठान्थे । प्रधानमन्त्रीलाई केन्द्रमा राखेर ओलीले आफ्ना कदम चालेका थिए ।
आफ्ना समकक्षी नेताहरू झलनाथ खनाल र माधवकुमार नेपाल प्रधानमन्त्री भएपछि ओलीलाई पनि प्रधानमन्त्री बन्ने चाहना पलाएको थियो । प्रधानमन्त्री बन्नका लागि उनले पार्टी कब्जाको रणनीति अगाडि सारेका थिए । ओलीले प्रधानमन्त्री बन्नकै लागि संसदीय दलको चुनावी मैदानमा आफूलाई उतारेका थिए । अध्यक्ष झलनाथ खनाल र वरिष्ठ नेता माधवकुमार नेपालको समीकरण बने पनि संसदीय दलको चुनावमा ओलीले २५ मत बढी ल्याएर चुनाव जिते । पहिलो मिसनमा उनी सफल भए । सिंहदरबारस्थित पार्टी दलको कार्यालयमा भएको चुनावपछि ओलीले पार्टी महाधिवेशनलाई मिसन बनाएका थिए । आफू अध्यक्ष हुन उनले झलनाथको समर्थन खोजे र झलनाथलाई राष्ट्रपति बनाउने आश्वासन पनि दिए । ओलीको आश्वासन पाएका खनालले महाधिवेशनको अन्तिमसम्म पनि आफ्नो मौनव्रत खोलेनन् । खनालपक्षका सबैजसो नेताहरू नेपालको समूहमा लागेका भए पनि खनाल आफू चाहिं बोलेनन् । यसै साता काठमाडौंमा सम्पन्न पार्टीको नवौं महाधिवेशनमा ओलीले आफूलाई अध्यक्षको उम्मेदवार बनाएर पूर्व प्रधानमन्त्री नेपालसँग टक्कर लिए । उनलाई यो राम्ररी थाहा थियो कि पार्टी कब्जा भएपछि प्रधानमन्त्री बन्ने बाटोको आधा काम फत्ते हुन्छ । यसैका लागि उनले अध्यक्ष बन्ने दौडमा कुनै कसर बाँकी राखेनन् । र अन्ततः झिनो मतकै अन्तरमा भए पनि अध्यक्ष बन्न सफल भए । आफ्नो सबै टीमलाई जिताउन भने उनले सकेनन् । पार्टी महाधिवेशनबाट अध्यक्ष भएपछि ओलीको मिसन पिएम अर्थात् प्रधानमन्त्री बन्ने छ
। दशैंको आसपासमा सत्ता समीकरणमा संकट पैदा गराउने भावी नयाँ समीकरणका लागि बाटो तयार पार्ने ओली खेमाको रणनीति रहेको छ । यसका लागि ओली समूहले समयमै संविधान बनाउन नसकेको, सहकार्य गरेको दलसँग परामर्श नगरी एकलौटी तरिकाले सरकार संचालन गराएको तथा जनजीविकाका विषयमा सरकारले ठोस काम नगरेको जस्ता आरोप लगाएर कांग्रेससँगको सम्बन्धलाई थप संकटमा फसाउने रणनीति बनाएको छ ।पत्रकाहरुसँग निर्वाचनअघि गरेको कुराकानीमा ओलीले प्रष्ट रुपमा ‘पहिलेका सहमति पालना नगर्नेसँग मेरो र नेकपा–एमालेको सहकार्य हुनसक्दैन’ भनेर प्रष्ट पारेका थिए । यता, सरकारका निर्माणका क्रममा कांग्रेस र एमालेबीच भएको सबै सहमति मान्न कांग्रेस यतिबेला आनाकानी गरिरहेको छ । राष्ट्रपतिलाई अनुमोदन नै नगरी पेलेरै भए पनि नयाँ संसदले अनुमोदन नगरेको राष्ट्रपतिलाई कांग्रेसले संसदमा सम्बोधन गर्न लगाइसेको छ । ओली निकट नेताहरूको दाबी के छ भने सुशील कोइराला नेतृत्वको सरकारको आयु बढीमा मंसीरसम्म हुन सक्छ । त्यसपछि सत्ता समीकरण नयाँ बन्न सक्छ । कृषि मन्त्री हरिप्रसाद पराजुलीलले पनि एक सार्वजनिक कार्यक्रममा बोल्दै केपी ओली अबको प्रधानमन्त्री बन्ने ठोकुवा गरिसकेका छन् । कांग्रेससँगको सत्ता समीकरणलाई निरन्तरता दिंदा ओलीलाई प्रधानमन्त्री बनाउन नसकिने निष्कर्ष ओली समूहले यसअघि नै गरेको छ । ओलीले आफ्नो निवासमा मधेशवादी दलका केही नेताहरूसँग भावी सत्ता समीकरणका विषयमा समेत कुराकानी गरेका थिए । स्रोतका अनुसार ओली र उनी निकट नेताहरूले एकीकृत माओवादीका अध्यक्ष प्रचण्डसँग पनि भावी सत्ता समीकरणका विभिन्न विकल्पमाथि कुराकानी गरेका छन् ।
प्रकाशित मिति: 2014-07-20 01:35:37
प्रतिक्रिया: